- پاکستانی نجی ائر لائن کا جہاز پہاڑیوں سے ٹکرا گیا -

by **atankwaadi** » July 28th, 2010, 4:00 pm

پاکستان کی ایک نجی فضائی کمپنی ایئر بلو کا ایک مسافر بردار طیارہ وفاقی دارالحکومت اسلام آباد کے شمال میں مارگلہ پہاڑیوں پر گر کر تباہ ہوگیا ہے۔

یہ جہاز نجی جہاز ائر بلیو کمپنی کا تھا۔ اس میں ایک سو چھیالیس مسافروں کے علاوہ عملے کے چھ اہلکار سوار تھے۔

وزیر اعظم یوسف رضا گیلانی نے اس حادثے کی تحقیقات کے لیے پانچ رکنی انکوائری کمیٹی تشکیل دے دی ہے۔ اس کے علاوہ آج ہونے والا کابینہ کا اجلاس منسوخ کر دیا گیا ہے اور حکومت نے ایک روزہ سوگ کا اعلان کیا ہے۔

اس سے قبل وفاقی وزیر داخلہ رحمان ملک نے نجی ٹی وی سے بات کرتے ہوئے کہا کہ ابھی تک پانچ زخمیوں کو نکالا جا چکا ہے اور امدادی کارکن کارروائی کر رہے ہیں۔

انہوں نے مزید کہا کہ ائر کنٹرول ٹاور کو کوئی ایمرجنسی پیغام موصول نہیں ہوا۔ اس حادثے کے اسباب کا حتمی علم جہاز کے بلیک باکس کے ملنے کے بعد ہی ہو سکے گا۔‘

وزیر داخلہ رحمان ملک نے بتایا کہ طیارے کو کہوٹہ کی بجائے مری روڈ کی جانب سے اترنے کے لیے کہا گیا تھا۔ اس دوران چکر لگاتے ہوئے طیارہ دو ہزار چھ سو فٹ کی اونچائی تک آگیا لیکن اس کے بعد دوبارہ تین ہزار فٹ تک چلا گیا۔ ’یہ اچانک اوپر اٹھنے کی وجہ معلوم نہیں ہو سکی ہے۔‘ تاہم ان کا کہنا تھا کہ لوگوں کو سول ایوی ایشن اتھارٹی کی تحقیقات کا انتظار کرنا چاہیے۔

مارگلہ کی پہاڑیوں پر جگہ جگہ آگ اور دھواں بھی اٹھتا دکھائی دے رہا ہے۔

علاقے میں امدادی سرگرمیاں شروع کر دی گئی ہیں اور فوجی ہیلی کاپٹر بھی پہاڑوں کے اردگرد اڑتے نظر آ رہے ہیں۔

ائر بلیو کا یہ جہاز کراچی سے صبح سات بج کر پینتالیس منٹ پر روانہ ہوا۔

پاکستان کی نجی فضائی کمپنی ائر بلیو کے جنرل منیجر مارکیٹنگ راحیل احمد نے بتایا ہے کہ حادثے کا شکار ہونے والا طیارہ بالکل سالم اور پرواز کے لیے فٹ تھا۔ جہاز میں کسی قسم کی فنی خرابی کا سوال ہی پیدا نہیں ہوتا۔

جنرل منیجر کا کہنا ہے کہ طیارے میں ایک سو باون لوگ سوار تھے جن میں عملے کے چھ لوگ بھی شامل ہیں۔انہوں نے بتایا کہ حادثے کا شکار ہونے والے طیارے میں دو کمسن بچے بھی سوار تھے جن کی عمریں تین سال کے اندر ہیں۔

انہوں نے بتایا ہے کہ حادثے کا شکار جہاز ائر بس تین سو اکیس ہے۔ اور ائر بلو کے پاس چھ ائر بس طیارے ہیں۔ انہوں نے بتایا ہے کہ نجی فضائی کمپنی ائر بلو جون دو ہزار چار سے کام کر رہی ہے اور اس نجی کمپنی کے طیارے سے پہلی مرتبہ حادثہ پیش آیا ہے۔

اسلام آباد کے سیکٹر ایف سکس اور ایف سیون کے رہائشیوں کا کہنا ہے کہ صبح انہوں نے ایک مسافر طیارے کو انتہائی نیچی پرواز کرتے دیکھا ہے۔ اسلام آباد میں گزشتہ چوبیس گھنٹوں سے شدید بارش کا سلسلہ جاری ہے اور صبح بھی شہر پر کافی نیچے بادل منڈلا رہے ہیں۔

اسلام آباد کا بینظیر بھٹو بین الاقوامی ہوائی اڈہ شہر کے جنوب میں واقع ہے۔ اور سیکٹر ایف سیون اور سکس پر سے پروازیں نہیں گزرتیں۔ یہ علاقے اہم سرکاری عمارات کے قریب بھی واقع ہے۔

پاکستان فوج کے شعبہ تعلقات عامہ آئی ایس پی آر کے ایک بیان کے مطابق امدادی کاموں میں حصہ لینے کے لیے تین ہیلی کاپٹر اور ایک انفنٹری بٹالین کو روانہ کر دیا گیا ہے۔

جائے حادثہ

مارگلہ پہاڑیوں پر موجود ہمارے نامہ نگار نے بتایا کہ پہاڑی کے چوٹی سے تھوڑا نیچے دھواں اٹھتا دکھائی دے رہا ہے اور سفید سفید ٹکڑے بھی نظر آ رہے ہیں۔

سول ڈیفنس، فوج، کیپیٹل ڈیولپمنٹ اتھارٹی، ریسکیو 1122 کے اہلکار امدادی کاموں کے لیے روانہ ہیں۔

فائر بریگیڈ اور ایمبولینس مارگلہ پہاڑی کی سڑک پر موجود ہیں۔ امدادی کارکن کچے راستے سے جہاز تک پہنچنے کی کوشش کر رہے ہیں کیونکہ جس جگہ یہ واقعہ پیش آیا ہے وہاں سڑک نہیں جاتی۔

اسلام آباد کے ڈی آئی جی بنیامن جو امدادی کاموں کے انچارج ہیں کا کہنا ہے کہ امدادی کاموں میں مشکل اس لیے ہو رہی ہے کہ ملبے میں آگ لگی ہوئی ہے۔

ان کا کہنا تھا کہ امدادی کام کے لیے راستہ بنایا جا رہا ہے۔

انہوں نے کہا کہ اس وقت اعضا اکٹھے کیے جا رہے ہیں اور بیگوں میں ڈالے جا رہے ہیں۔

نامہ نگار نے بتایا کہ جہاز کے ٹکڑے بکھرے ہوئے ہیں اور ملبے میں آگ لگی ہوئی ہے اور امدادی کام نہایت غیر منظم طریقے سے جاری ہے۔ ڈی آئی جی نے بتایا کہ کوشش کی جا رہی ہے کہ ہیلی کاپٹر کے ذریعے پانی پھینکا جائے تاکہ ملبے میں لگی آگ بجھے تو مزید امدادی کارروائی ہو سکے۔

by **snowy** » July 28th, 2010, 6:38 pm

Inna Lilla He Wa Inna Ilehe Rajioon
Its a mourning day for pakistan why does this country have to face so much just pray to God to have mercy on us my heart goes out to all people who have lossed their loved one allah protect every mankind on this universe